أيام كان ....
لينا فرن وجرن
وليهم منخل وغربال
كان خيرنا فى بيتنا
وأكلنا من فأسنا
وقرارنا من رأسنا
ولا حوجه لسوق ولا بقال
كان حزننا واحد
وفرحنا واحد
والعيشه عال العال
لا فى يوم حد سرق
ولا يوم حد خان
وكنا مرتاحى البال
يوم الفرحه تجمعنا
وكل الناس تسمعنا
والحق دايما يتقال
ووقت العصارى
المصطبه تجمعنا
مااحلاها كباية الشاى
الرايح مع الجاى
والماشى يقولك باى
أيام عز متعرفش ازاى
وعند الرحايا
تتلم الصبايا
بيدك يااختى معايا
اجهز بيدى غدايا
للعيله وزوجى وضنايا
مااحلاها اللمه
ساعة الطبليه
اهلى وأهله
وجارتى سنيه
واللقمه هنيه
زمن كان فيه رجال
عيل كان يغلط
تلقى الحق يتقال
الدنيا انعكس حالها
صبح الكبار عيال
وكل واحد له سؤال
وفى الفتن
فلان صال وفلان جال
وتبدلت الأحوال
لما ماتت الرجال
وصبح فى المشهد عيال
قطب زيد
ليست هناك تعليقات:
إرسال تعليق