( طلب حضور ) ...بقلم ..م /عبالحميد سالم

( طلب حضور ) م /عبالحميد سالم
يا مية خسارة ع اللى ربى
واللى كبر واللى علم
واللى عاش عمره  يلملم
جار زمانه عليه وعلم
وم المحكمة جاله محضر
إمضيلى  ياحج  بالاستلام
وف الميعاد ضرورى تحضر
خير يابنى انا راجل ف حالى
عمرى م فيوم حد اشتكانى
راجع  العنوان بالله عليك
لأ  ياحج دا عنوانك بالتمام
واللى رافعين القضية ولادك
طالبين حكم بالحجر عليك
****
ويوم الجلسة ونظر القضية
صاحبنا مكنش م الحضور
وحكم القاضى طبقا للمادة
لولاده بالتصرف في الامور
رجعوا الببت ف غابة السعادة
لقوه ميت وصوان منصوب ونور
ومحامى حاضر ومعاه وصية
لا حد منكم يمشى ف جنازتى
ولا يوم يزورنى ع القبور
وان كان على الدنيا خدوها
واستنوا إعلام على يد محضر
م المحكمة فيه طلب حضور
لأن ولادكم هتحجر عليكم
دا كأس وع العاق لازم يدور