شئ غريب يا حسن اللى حصل ...بقلم /خالدعبدالمعطى

شئ غريب يا حسن اللى حصل
و اللى جرالى ماتوصفش..
..
طول عمرى فى حالى ماشى دوغرى
من حتى صغرى دنيتى واخدها افش..
..
جد خالص و الحب عندى مالوش وجود
و ان شافوا قلبى يقول ما شافش..
..
و لا عمرى اتخطى الحدود
حتى قلبى عاملوه كود
لحد انهارده ما انكتبش..
..
طول عمرى قلبى مكلفته
شباك و قافل ضلفته..
..
و مهما قابله فى سكته
طرف عينه ما انطرفش..
..
تيجى صدفه فى حياتى صدفه
و معاها فجأه القلب يدفى
و شعور يا عالم ما توصفش!!!!
..
لا و الغريبه ان قلبى ماعدش طوعى
مدت اديها بين ضلوعى
و راح لها راضى و كمان ماخافش..
..
مش هو قلبى يا حسن
اللى عارفه من سنين..
..
حاله اتبدل بقى فيه شئ اسمه الامل
و شئ غريب اسمه الحنين..
..
و كأنى العمر اللى مضى
كان سجن و بحكم القضا انا فيه سجين..
..
هقولك ايه يا حسن الكلام
ماهوش كفايه..
..
كل اللى عارفه قلبى انا
مبقاش معايا..
..
شكلى من بره هو.. هو
ما اختلفش..
..
بس جوه
ساكنه هى ازاى يا صاحبى
انا ما اعرفش..
..
#خالدعبدالمعطى