مش راح اسيبك يا مصر... كلمات/ اسامة فؤاد حنا

مش راح اسيبك يا مصر كلمات اسامة فؤاد حنا
باقولها ولالف مرة
مهما اجوع او اتعرى
او كانت العيشة مرة
مش راح اسيبك يا مصر
او افكر اسافر بره
لوكانت الدنيا عتمة
او حسيت بمرارة وكتمة
او مريت مرة بازمة
طول مانت بخير يا مصر
كل ده مالهوش لزمة
لو نمت على الرصيف
وملقتش حق الرغيف
امرك على رقبتى سيف
مش راح اسيبك يا مصر
واعيش بره غريب وضيف
مرارك فيه حلاوة الدنيا
وقسوتك عطف وحنية
وترابك هو كحل عينيه
مش راح اسيبك يا مصر
وانت اغلى واحن ماليه
ندا جندك الله واكبر
و ف الحرب العدا يدمر
وف السلم يبنى ويعمر
مش راح اسيبك يا مصر
وافديك بروحى لو اقدر
مهما رحت او وجيت
وتهت ف الدنيا ولفيت
زيك يا مصر ما لقيت
مش راح اسيبك يا مصر
ده انت ليه حضن وبيت
شدى يا بلدى حيلك
اندهينى وبسرعة اجيلك
وارتوى من ميه نيلك
مش راح اسيبك يا مصر
وهاعيش عمرى فى خيرك
بحبك يا بلدى بجد
يا بلد الهرم والسد
وانا ثابت دايما ع الوعد
مش راح اسيبك يا مصر
و ابنى بايديه اللى اتهد