(سوالف وكت )
مابيه حيل أمشي مشي
ولابيه حيل عالحجي
الي ينافق موش من ربعي
ولا أدنيه صديج
وماأندبه بيوم ماطيح ابشدايد
لو بضيح
ولا أريد بيوم موتي
يشكلي زيج
وكت ياغم الوكت
تصاحبه وتنطيه روحك
ياكلك ويشربك
ويبلع الريج
والله مليتك وجزعتك يازمان
كافي أريدن راحتي
وين جا ذيج المساحي
وين وين
كعدات المضايف
جنت الاعب ذاك فنجاني
اليخن وي دلتي
وجنت أزيح الشرع كوه
من النهر
ماي هم خابط وشربه
ومن أجرعه
طيبة الدهله شحلاته
بيه أوصل غايتي
نشفت من عيني نهرين وجداول
الجنت أسوي إسدوهن من دمعتي
وهسه أعبرك يافراتي
المردي بطينك يغرز
راحن إطيور الحباري والفخاتي
وكمت أللوب بحسرتي
ياوسفتي
مابقه عندي من البجي
ولا بيه حيل عله الحجي
إلي تكت بس دمعتي
شسولفلك من بلاوي
وتريد أسولف قصتي
حميد شاكر الشطري
ليست هناك تعليقات:
إرسال تعليق