وطاويط
كلمات : حسام الدين فكري
.................
هُمّه البشر إيه
غير وطاويط مساكين
لا في النهار شايفين
ولا في الليل نايمين
صاحيين..مبحلقين
في السقوف..وفي الكفوف
في العروش..وفي النعوش
وفي الحاجات اللي...
في إيدين الناس التانيين !
غلابة مابيلحقوش
يحفظوا حتى الوشوش
والقلم يكتب إيه..ولاّ إيه
وهوه ياعيني عليه
حبّه ينام مهزوز
وحبّه يقوم مرعوش
يحكي عن اللي فاتوا
ولاّ عن الجايين
تصدّق بإيه
مفيش فرق كبير
أهو كلنا جينا..وكلنا رايحين
شوف انت بنفسك واحكم
كل اللي كانوا عايشين
فوق البراكين أساطير
راحوا فين
ولاّ فاضل منهم إيه
هيّه الدنيا أصلها يومين
وتحسّهم بالعافية لحظتين
والسنين فيلم قصير
مليان أحداث كتير
ومواقف وحكاوي
ورغي مالوش لزوم
وناس ملهاش لزوم
وفخ عميق وكبير
وكلنا في الخيّة مزنوقين
ومضطرين..نعيش الساعات
ونمشي على خط السنين
والحنين..ياعيني ع الحنين
وطواط كمان...
بس قلبه رهيف
بيدوب من لمسة دفا
ويغوص في عيون العاشقين !
ليست هناك تعليقات:
إرسال تعليق