مغامر
""""
حبك في قلبي
متراكم زي السنين
زي الآنين
زي احزان المحرومين
زي ليل الشتا
مليان عتمه
عريان لمة
متشبع بالحنين
والسؤال عن اللي غابوا
والتعجب على اللي سابوا
واللي صعبان ع القلب منهم
وهما عادي ومبسوطين
حبك في قلبي
زي عقد في رقبة صبية
حباتة مرمرية
في الشمس يلمع
بس في الليل يخنق
يخنق ويوجع
قبلما منه اشتكي
يسابقني الفجر يطلع
افرح انك معايا
مع ان الشوق
مخلي القلب يتقطع
ومين يسمع!!
حبك في قلبي
زي احلام العذارى
مليان خجل
مليان امل
بس من خوفة بيدارى'
في عيوني باين
رغم حرصي انه يبان
رغم قفلي للبيبان
رغم اني من كتر شوقي
بيتلوى النبض فيّ
زي بطن بات جعان
حبك في قلبي
ملكني رغم اني
فاكر نفسي حر وكل سني
انصح الناس بلاش قيود
بلاش تبقى لسه عايش
بس عيشة بطعم موت
حبك في قلبي موتني
عن كل حاجه الا اسمك
الا ضحكة من شفايفك
إلا رسمك
الا خيال طول الوقت حاضر
معيشني عيشة مغامر
شايف بعيني الخوف
شايف حدود
شايف مخاطر
الا ان حبك في قلبي
كامل السيطره
وبالقلم والمسطره
خلاني عبد
هو يأمر
وما عندي الا حاضر
ما انا قلبي مغامر
"""
عاطف
16/12/2019
ليست هناك تعليقات:
إرسال تعليق