وانا ع البحر ...كلمات/ اسامة فؤاد حنا

وانا ع البحر كلمات اسامة فؤاد حنا
وانا ع البحر ساعة عصرية
والموجة بتلعب رايحة وجاية
لمحت بنت حلوة شقية
وكان البحر بعت جنيه
او نزلت م الجنة حورية
حركت مشاعر ماتت فيه
كانت من زمان منسية
هو انا صاحى ولا نايم
ولا خيالى بيلعب بيه
لو انا باحلم والله ما قايم
ويا ريت يطول الحلم شوية
يا رب تكون دى حقيقة
والدنيا بعتت لى هدية
بنوتة حلوة ورقيقة
اجمل ما شافتها عينيه
وكان ده كله كان سراب
او كانه طيف وخيال
اكلمها ومفيش جواب
وفضلت على ده الحال
يا حبيبى اتكلم قول
ده انا حبيتك من اول نظرة
ده جمالك مش معقول
ومن غيرك اعيش ف حسرة
واخيرا الحلو اتكلم
وسمعت منه احلى كلام
من عيونه يا رب سلم
واتاريه حلم من الاحلام
ومن يومها باصحى من الصبحية
وعينى تملى تكون ع الميه
يمكن البحر يمن عليه
ويبعت لى من تانى صبية