من وانا فى اللفة...// كلمات اسامة فؤاد حنا

من وانا فى اللفة كلمات اسامة فؤاد حنا
من وانا صغيرة فى اللفة
باحلم بفرحى وبالزفة
وانا زى كل البنات
باعد الايام والساعات
احلم بعريس يخاف عليه
يحبنى ويراعى ربنا فيه
يجيب لى بوكيه ورد
وعلى نار يستنى الرد
اويخطفنى على حصانه
وياخدنى بشوق بين احضانه
ويكون اصيل وابن حلال
ويبقى عندى بيت وعيال
ولا عايزة شبكة ولا مهر
انا مش طالبة غير الستر
وفكرى تاه منى وسرح
وحلمت بالكوشة وبالفرح
واخيرا الدنيا ضحكت لى
وانا اللى افتكرتها نسيتنى
والعدل خبط على بابى
وغاروا منى كل اصحابى
وسمعت احلى زغرودة
وكل الناس  كانت مبسوطة
ولبست الدبلة فى الشمال
مع الغوايش والانسيال
وكمان الفستان والطرحة
وطرت من كتر الفرحة
وعزمت كل اهل الحتة
و اصحابى فوزية وبطة
وخلاص كتبنا الكتاب
واتلم شمل الاحباب
و تمت فرحتنا وسعادتنا
واتقفل علينا باب شقتنا
واتعدلت اخيرا الكفة
ووعدنى حبيبى ووفى
ده انا ياما وانا ف اللفة
حلمت بفرحى وبالزفة